ប្រាសាទ បក្សីចាំក្រុង
.jpg)
ប្រាសាទបក្សីចាំក្រុង ស្ថិតនៅខាងមុខក្លោងទ្វារចូលនៃទីក្រុងអង្គរធំ ខេត្តសៀមរាប ដែលបានសាងសង់ឡើងនៅឆ្នាំ៩២១ នៃគ្រិស្ដសករាជ ដោយព្រះបាទហស៌វរ្ម័នទី១ ។ សំណង់ប្រាសាទធ្វើអំពីដីឥដ្ឋ និងមានកំពែង ក៏ប៉ុន្ដែប្រាសាទនេះត្រូវខូចខាតខ្ទេចខ្ទាំស្ទើរតែទាំងអស់ទៅហើយ ។ ទោះយ៉ាងនេះក្ដី សារសំខាន់របស់ប្រាសាទនេះ គឺសិលាចារឹកនៅខាងក្នុងប្រាសាទបានផ្ដល់ការយល់ដឹងពីប្រវត្តិសាស្ដ្រ របស់ខ្មែរយើង ។
.jpg)
នៅប្រអប់ទ្វារខាងឆ្វេង និងស្ដាំនៃក្លោងទ្វារទៅកាន់អាសនៈនៃប្រាង្គប្រាសាទ គេឃើញមានសិលាចារឹករៀបរាប់បញ្ជាក់អំពីការភ្ជាប់សន្ដតិវង្សចេនឡា និងនគរភ្នំ ពោលគឺរវាងសូរ្យវង្ស និងសោមវង្ស ដែលវង្សទាំងពីរនេះ សុទ្ធសឹងតែតពូជពង្សវង្ស ត្រកូលពីឥសីកម្ពុទាំងអស់ ។ ប្រវត្តិសាស្ដ្រនៃប្រទេសកម្ពុជាយើង គឺព្រះរាជវង្សានុវង្សចេនឡាដំបូងបង្អស់ មានដើមកំណើតចេញពីឥសីកម្ពុស្វយម្ភូវ (ឥសីដែលកើតឡើងដោយខ្លួនឯង) និងព្រះនាងទេពអប្សរមេរា (ដែលជាព្រះរាជអំណោយរបស់ព្រះឥសូរ) ។ ព្រះឥសូរជប់នាងទេពអប្សរនេះឡើង ដើម្បីព្រះរាជទានឲ្យឥសីកម្ពុធ្វើជាមហេសី ។
ដូច្នេះពាក្យកម្ពុជា ដែលជាឈ្មោះរបស់ព្រះរាជាណាចក្រកម្ពុជាបច្ចុប្បន្ន គឺមានប្រភពចេញពីទេវកថានេះឯង ។ នៅក្នុងសិលាចារឹកក៏បានឲ្យដឹងទៀតថា ព្រះមហាក្សត្រដំបូងនៃសន្ដតិវង្សចេនឡា គឺព្រះបាទស្រុតវរ្ម័ន ។ ព្រះអង្គ មានព្រះរាជបុត្រព្រះនាមព្រះបាទស្រេដ្ធវរ្ម័ន ដែលបានកសាងឡើងទីក្រុងស្រេស្ធបុរៈ ឬកុរុក្សត្រ នៅតំបន់វត្តភូ ខេត្តចម្ប៉ាសាក់ ក្នុងប្រទេសឡាវសព្វថ្ងៃ ។
ក្រៅពីបញ្ហាសន្ដតិវង្សនៃព្រះរាជាខ្មែរ ដែលសោយរាជ្យក្នុងសម័យបុរាណ យើងក៏បានដឹងព័ត៌មានស្ដីពីនយោបាយដែលមានលក្ខណៈជាប្រវត្តិសាស្ដ្រ ជាតិ គឺប្រទេសចេនឡាបានរំដោះអ្នកស្រុកចេនឡាឲ្យផុតពី ច្រវាក់សួយសាអាករ ពោលគឺរំដោះខ្លួនចេញពីការត្រួតត្រារបស់នគរភ្នំ ។
.jpg)
ចាប់តាំងពីពាក់កណ្ដាលសតវត្សរ៍ទី៦ ព្រះរាជានៃចេនឡា ដូចជាព្រះបាទភវវរ្ម័ន ដែលជាព្រះបុត្រារបស់ព្រះបាទវីររ្ម័ន និងជាចៅរបស់ព្រះបាទរុទ្រវរ្ម័ន ដែលជាស្ដេចមានឥទ្ធិពលដ៏ខ្លាំងក្លា ។ ស្ដេចអង្គនេះបានចាប់ផ្ដើមបើកការវាយលុកលើនគរភ្នំកាន់តែខ្លាំង ឡើងៗជាលំដាប់ រហូតដល់ទទួលជ័យជំនះជាស្ថាពរ ក្នុងរជ្ជកាលរបស់ព្រះបាទឥសានវរ្ម័នទី១ (៦១០-៦៣៥ គ្រិស្កសករាជ) ។
តាមរយៈសិលាចារឹកនៃប្រាសាទបក្សីចាំក្រុងនេះ ធ្វើឲ្យយើងបានដឹងថា ព្រះបាទវរវរ្ម័ន បានរៀបអភិសេកជាមួយក្សត្រីកម្ពុជរាជ ដែលជាព្រះញាតិខាងម្ដាយរបស់ព្រះបាទស្រេស្ធវរ្ម័ន ។
ដោយមូលហេតុនេះហើយ បានជាព្រះមហាក្សត្រខ្មែរនាសម័យអង្គរសុទ្ធសឹងតែតពូជពង្សពី សន្ដតិវង្សទាំងពីរគឺ សូរ្យវង្សនិងសោមវង្ស ៕
Post a Comment